تمنيت ابوي اليوم يدري

وايشوف دم احسين يجري

او حادي ظعنه گام يسري

او بالسوط بويه انفصم ظهري

دنهض يكشّاف الكروب

يابو الحسن باداحي البوب

يسر القضا يا محنة ايوب

يمن دوم بالشدّات مندوب

ترى ابنك ابحدّ السيف مضروب

اوشيبه ابدمّ النحر مخضوب

او راسه براس الرمح منصوب

او سجّداكم بالقيد مسحوب

او نسوانكم بين الشعوب

سبايه او منها القلب مرعوب

جيف الحراير والركوب

دنهض اورد العتب والنوب

يبويه اشعوگك عنّي ولاجيت

الدنيا بعينها بانت ولاجيت

يبويه انهضمت اعيالك ولاجيت

ابين القوم تتلاعه سبيّه

اجيت الكربلا زينب وانابوچ

نخيتي اخوتج ما نهضوا وانابوچ

لتخافين انا ذخرج وانا بوچ

اجيت امن الغري للغاضريّة